Kërcënoi prokurorin, arrestohet deputeti Milaim Zeka

Është arrestuar mëngjesin e sotëm deputeti i Nismës Socialdemokrate Milaim Zeka.

Zëvendëskryeprokurori i Prokurorisë  Themelore në Prishtinë Ibrahim Berisha ka bërë të ditur se pas disa kërcënimeve që Zeka i bërë në media prokuroria ka kërkuar arrestimin e tij.

“Prokurori ka kërkuar arrestimin  e tij pasi që dyshohet se ai ka kryer veprën penale kanosje. Kohëve të fundit Zeka përmes mjeteve të Informimit ka dal me disa kërcënime”, ka thënë Berisha, përcjell albinfo.ch.

Zekës i është caktuar masa e ndalimit prej 48 orësh. Deputeti i Nismës Milazim Zeka gjatë një interviste ditë më parë kërcënoi prokurorin special Afrim Shefkiun i cili ka ngritur aktakuzë atij në rastin e mashtrimit me viza. Zeka kishte thënë se do të qëroj hesapet vetë me prokurorin.

“Ma përpara ia kisha falë nëse ma kish vra njërin prej fëmijëve në afekt sesa kështu me ia shkatërru njerëzve ëndrrat. Mua më kanë poshtëruar”, kishte thënë Zeka.

Edhe Këshilli Prokurorial i Kosovës ka dënuar ashpër deklarimet publike dhe kërcënimet, të cilat kohëve të fundit janë drejtuar ndaj prokurorëve të shtetit.