Këngëtari Neil Young vë në ankand disa gjëra të tij të vlefshme

Rok këngëtari, Neil Young, është duke shitur disa prej posedimeve të tij më të vlefshme, siç është një koleksion i modeleve të trenave.

Ylli kanadez është duke shitur më shumë se 250 trena të tij të llojit Lionel, në një ankand që do të mbahet në Los Angeles.  Young, i njohur kryesisht për hitet e tij nga festivali Woodstock, si “Ohio” dhe “Heart of Gold”, ishte koleksionues i pasionuar i modeleve të trenave tashmë më shumë se 20 vjet.

Koleksioni i tij është shumë i pasur dhe përmban lloje të ndryshme të trenave dhe i shfrytëzoi vite më pas si lidhje mes tij dhe djalit të tij Ben, i cili vuan nga paraliza cerebrale.

Ankandi do të mbahet më 9 dhjetor dhe pjesa më e vlefshme që mund të shitet deri në 20 mijë dollarë është një prototip i lokomotivës Lionel.