Kampioni shqiptar pa nënshtetësi të Shqipërisë

Para çdo lufte ai ka ngritur flamurin kombëtar dhe ka dëgjuar himnin shqiptar, por kampioni i Evropës në boks, Nuri Seferi nuk ka nënshtetësinë shqiptare

Boksieri më i talentuar dhe më i suksesshëm aktualisht, Nuri Seferi i cili rimori titullin e kampionit të Evropës në kategorinë WBO, mbi 30 herë ka ngritur flamurin kuqezi në shtizë. Për herë të fundit ai u bë kampion, por ka një hendikep, sepse nuk ka nënshtetësinë e Shqipërisë.

Boksieri nga Gostivari pasi mundi me pikë hungarezin Tamas Lodin, u ribë kampion i Evropës në WBO. Para çdo lufte ai ka ngritur flamurin kombëtar dhe ka dëgjuar himnin shqiptar, por, 37 vjeçari ende nuk ka marrë përgjigje pozitive nga institucionet në Tiranë për t’u pajisur me nënshtetësinë shqiptare.

“Të jem i sinqertë kam bërë kërkesa, por fatkeqësisht kanë hasur në vesh të shurdhër dhe tani kam arritur të identifikohem si shtetas shqiptar në arenën ndërkombëtare, edhe pse nuk zotëroj pasaportën, edhe pse nuk më prish punë fare. Unë e bëj punën time, kam misionin tim, të ngre vlerat e kombit shqiptar, shtetit shqiptar”, thotë Seferi.

Kampioni i Evropës në karrierën e tij ka shënuar 36 fitore, 20 prej të cilave me nokaut. Shqiptari pa nënshtetësi shqiptare, siç raporton TCH, njihet në ringjet botërore me nofkën “Albanian Tyson”, ose ndryshe “Tajsoni shqiptar”.

“Këtë nofkë e kam marrë nga tifozët. Në fillim nuk më ka pëlqyer, por është e vërtetë që e majta është arma ime kryesore dhe ndoshta dyluftimi ka ngjashmëri”, shton Nuri Seferi.

Pas fitimit te titullit kampion, Seferi është pritur nga kreu i parlamentit Ilir Meta dhe Ministrja e Sportit Lindita Nikolla, të cilët kanë shprehur gatishmërinë që ta mbështesin kampionin për të realizuar ëndrrën e tij, të zhvillojë një ndeshje të madhe në Tiranë.

“Besoj që këtë herë ka bërë më shumë jehonë dhe shpresoj që ndeshjen e radhës të madhe ta zhvilloj në Tiranë”, deklaron ai.

“Jemi ne që kemi nevojë për Nuriun, jo Nuriu për ne. Dëshira jonë e vetme do të ishte që të paktën ta kishim dhe këtu gjithë shqiptaria të festonte në Tiranë një fitore të tij”, thotë Gentian Rrugia, përfaqësues i Tifozëve Kuqezi.

Ndryshe, shqiptarët gjatë periudhës së fundit kanë pasur një plejadë të boksierëve të suksesshëm, që kanë lënë gjurmë edhe në arenën botërore. Pas Luan Krasniqit, i cili për disa vite ka qenë ndër boksierët më në zë në botë, në këtë art marcial janë dalluar edhe Elvis Muriqi, Kreshnik Qato, Sefer Seferi etj.