Ka vrarë të shoqen– refuzon të flasë!

Ndërkohë, njeriu i vetëm që mund të dinte diçka rreth motivit të vrasjes, është i vdekur – bashkëshortja e tij

Një shqiptar nga Kosova, shtetas i Gjermanisë, i moshës 47 vjeçare ka vrarë në muajin shkurt të shoqen në mënyrën më mizore, duke e therur 33 herë me thikë! Pas kësaj ka provuar të mbysë veten, duke pirë detergjent për pastrimin e tualetit. Kishte qenë në rrezik jete por kishte shpëtuar.

Gjykata e Heilbronit ka filluar të martën procesin për vrasje, kundër shtetasit gjerman. Por, sipas të gjitha gjasave procesi do të zvarritet shumë. Shkak për këtë është refuzimi kategorik i vrasësit për të folur çfarëdo qoftë rreth vrasjes.

Ndërkohë, njeriu i vetëm që mund të dinte diçka rreth motivit të vrasjes, është i vdekur – bashkëshortja e tij, shkruan “heilnbronner Stimme”.

Çifti kishte filluar ndarjen në nëntorin e vitit 2010. Pasi që, sipas gruas, ai kishte kryer me të marrëdhënie seksuale “kundër dëshirës së saj”, ajo e kishte denoncuar bashkëshortin në polici. Për pasojë, ai ishte detyruar të lëshonte banesën.

Por në shkurt, me ndihmën e një çelësi të falsifikuar 47 vjeçari kishte hyrë në banesën e të shoqes. Tre fëmijët nuk ishin aty.

Pas fjalosjes, burri kishte marrë një thikë të kuzhinës, me të cilën e kishte goditur të shoqen plot 33 herë. Ajo kishte vdekur në dyshemenë e dhomës së fjetjes. Pastaj kishte bërë përpjekjen për të mbytur veten me lëngun për pastrimin e WC-së.

Gjykata , për shkaqe sigurie ka bërë kontroll të ashpër të gjithë pjesëmarrësve në procesin gjyqësor.

Pritet që procesi gjyqësor të zgjasë së paku deri në fillim të vitit 2012.