Jill Biden, vizitë surprizë në Ukrainë

youtube - Jill Biden

Zonja e parë e Shteteve të Bashkuara të Amerikës, Jill Biden, ka mbërritur sot në Ukrainë, ku është takuar me Zonjën e Parë të Ukrainës, Olena Zelenska, shkruajnë mediat amerikane, përcjell albinfo.ch.

Kjo ishte një vizitë e paparalajmëruar, e cila u bë e ditur pas largimit të zonjës Biden nga vendi. Ajo u bë figura e fundit amerikane e profilit të lartë që hyn në Ukrainë gjatë konfliktit 10-javor me Rusinë.

Zonja e Parë amerikane e takoi para një shkolle zonjën Zelenska, duke e përqafuar atë dhe duke i dhuruar një buqetë me lule.

“Doja të vija në ditën e nënës”, i tha zonja Biden zonjës së parë të Ukrainës, duke iu referuar ditës që është një festë e rëndësishme në Shtetet e Bashkuara.

“Mendova se ishte e rëndësishme t’i përcillja popullit ukrainas mesazhin se kjo luftë brutale duhet të ndalet dhe se populli amerikan qëndron me popullin e Ukrainës”, tha zonja Biden.

Zonja e Parë shkoi në qytetin e Uzhhorodit, rreth 10 minuta me makinë nga një fshat sllovak në kufi me Ukrainën, ku qëndroi për rreth dy orë, përcjell tutje albinfo.ch.