Për herë të parë Rusia sulmon pikat e karburantit në Kiev me dronë me motor reaktiv

Rusia i ka sulmuar pikat e karburantit në Kiev me dronë me motor reaktiv.

Kryetari i qytetit, Vitali Klitschko ka njoftuar se të paktën dy persona humbën jetën dhe 12 të tjerë u plagosën nga goditjet në dy pika karburanti të premten në mëngjes.

Sulmet e kryera gjatë orarit të pikut të trafikut pasojnë një sulm të ngjashëm ndaj një pike karburanti të enjten, i cili ishte i pari i këtij lloji në kryeqytet.

Në pikën e karburantit “Ukrnafta” në lagjen Pochaina, në veri të Kievit, dëshmitarët thanë se tre persona ishin plagosur nga shpërthimi i së premtes: menaxheri i një lavazhi aty pranë, bashkëshortja e tij dhe drejtuesi i një makine që po kalonte. Automjeti i shkatërruar kishte mbetur në anë të rrugës; xhamat ishin thërrmuar dhe sediljet ishin spërkatur me gjak, transmeton albinfo.ch.

Raportohet se të mërkurën, në Telegram filloi të qarkullonte një listë me 18 pika karburanti në Kiev që parashikohej të goditeshin nga dronët rusë dhe të tri pikat e goditura deri më tani ishin në atë listë.