Ukrainë: 37 të vdekur nga sulmi me dron rus, shpërthen depoja ushtarake e Ukrainës

Foto ilustrim nga arkivi: Keystone EPA/VASILIY ZHLOBSKY

Nga zona janë evakuuar mbi 370 persona.

Presidenti ukrainas, Volodymyr Zelensky, ka njoftuar se objekti i goditur ndodhej në qytetin Myla dhe se pas goditjes fillestare pasoi një shpërthim i madh, teksa bëri të ditur se bëhej fjalë për një depo të ushtrisë ukrainase, ku ruheshin predha, dronë dhe municione të tjera.

Zelensky pranoi se municionet ishin vendosur në një zonë që nuk duhej të përdorej për këtë qëllim, pranë banesave.

“Municione nuk mund të ruhen pranë shtëpive apo zonave të tjera të banuara”, tha ai, duke njoftuar gjithashtu nisjen e procedurave penale për neglizhencë zyrtare.

Kryeministri ukrainas, Serhii Koretskyi, e cilësoi ngjarjen si një tragjedi të rëndë dhe kritikoi faktin që gabimet e mëparshme nuk ishin marrë si mësim, pasi në korrik, një tjetër depo municionesh pranë Kievit, në Vyshneve, ishte përfshirë nga zjarri pas një sulmi, duke shkaktuar 22 viktima. Hetimet e asaj ngjarjeje kishin evidentuar shkelje serioze të rregullave për distancën mes objekteve ushtarake dhe zonave të banuara.

“Është neglizhencë kriminale të përsëriten të njëjtat gabime në vitin e pestë të pushtimit në shkallë të plotë”, deklaroi ai, duke kërkuar ndëshkimin e të gjithë përgjegjësve.

Ministria ruse e Mbrojtjes konfirmoi sulmin, por e paraqiti objektivin në mënyrë tjetër pasi u tha se goditja kishte në shënjestër një magazinë në Myla ku ruheshin komponentë dhe përforcues lëshimi për dronë me rreze të gjatë.