Jashari, i dyshuar për plagosjen e Vllasit

Murat Jashari, vëllai i komandant “Kumanovës”, konsideron si personi i dyshimtë që ka marrë pjesë më sulmin me armë zjarri ndaj avokatit Azem Vllasi

Murat Jashari, vëllai i komandantit të UÇK-së, Ismet Jashari “Kumanova” është arrestuar nga Policia e Kosovës nën dyshimin se ka marrë pjesë në sulmin ndaj avokatit dhe analistit politik, Aazem Vllasi. Bashkë me Jasharin është arrestuar edhe një person tjetër, të cilët po mbahen nga Policia nën dyshimin se kanë plagosur me armë zjarri ish funksionarin, Vllasin.

Zëdhënësi i Policisë së Kosovës, Baki Kelani, ka bërë të ditur se për hetimin e rastit si dhe lokalizimin e personave të dyshuar, policisë i ka asistuar edhe Agjencia e Kosovës për Inteligjencë.

“Policia e Kosovës në bashkëpunim me AKI kanë arritur që ta bëjnë lokalizimin e personave të dyshuar. M.J (1956) është personi i parë, si dhe A.LL (1965), dyshohet që është pjesëmarrës në këtë rast”, ka thënë Baki Kelani.

Jashari ndodhet në stacion të policisë dhe është duke u marrë në pyetje, ndërsa Policia e Kosovës pas pak pritet të dalë në një konferencë për media për ta kumtuar arrestimin dhe për të dhënë detaje.

Sipas tij, Policia e Kosovës ka bërë bastisjen e lokacioneve të ndryshme, duke përfshirë shtëpitë e të dyshuarve. Po ashtu janë sekuestruar dokumentet e të dyshuarve dhe incizimet e kamerave, citon Express.

Për plagosjen e Vllasit kanë reaguar institucionet kosovare, të cilat kanë kërkuiar që ratsi të zbardhet sa më parë.

“Duke i uruar shërim të shpejtë z. Vllasi, Qeveria e Kosovës konsideron se veprime të tilla janë krejtësisht të papranueshme në një shoqëri demokratike. Qeveria e Kosovës, po ashtu, fton institucionet kompetente të rendit dhe drejtësisë që të vënë para përgjegjësisë kryesit e këtij akti kriminal”, thuhet në reagimin e Qeverisë së Kosovës.