Jahmir Hyka nënshkruan për FC Luzern

FC Luzern angazhimin e tij e konsideron si përforcim të saj. Ai ka nënshkruar kontratën që zgjat deri në fund të qershorit të vitit 2012

FC Luzern, skuadra e superligës nga Zvicra e mesme që ka pretendime të mëdha për sezonin që vjen, ka angazhuar në radhët e veta lojtarin mesfushor shqiptar nga KF Tirana, Jahmir Hykën.

Hyka 23 vjeçar, i gjatë vetëm 1.68 m., njihet si futbollist ofensiv dhe FC Luzern angazhimin e tij e konsideron si përforcim të saj. Ai ka nënshkruar kontratën që zgjat deri në fund të qershorit të vitit 2012 me opcionin për ta vazhduar.

Jahmir Hyka ka luajtur deri më tash 21 ndeshje me fanellën e kombëtares së Shqipërisë. Në moshën 16 vjeçare ai ka filluar të luante për KF Dinamo. Në sezonin 2008/2009 Hyka ka luajtur për FSV Mainz 05 për t`u shpërngulur pastaj në Panionios të Athinës. Prej atje ai qe kthyer në Tiranë ku ka qenë nën kontratë deri më tash.