Jahjaga premton rishqyrtimin e Kodit Penal

Presidentja, Atifete Jahjaga, ka shprehur vullnetin për të rishqyrtuar Kodin e ri penal dhe të rishikojë elementet juridike të ofruara nga Asociacioni i Gazetarëve Profesionist të Kosovës. Kështu u vendos pas një takimi të zhvilluar me përfaqësuesit e AGPK-së, dhe mediave, ku këta të fundit kanë vendosur në mënyrë unanime që me 3 maj të bojkotojnë punën e institucioneve të Kosovës.

Përfaqësues të Asociacionit të Gazetarëve Profesionist të Kosovës dhe të mediave kanë marrë përgjigjeje pozitive nga presidentja, Atifete Jahjaga për të rishqyrtuar Kodin e ri penal.

Arben Ahmeti, kryetar i AGPK-së, tha se kemi praktikat më të mira evropiane për të kundërshtuar dy nenet që e ngufasin punën e mediave”

Ahmeti theksoi se në shenjë pakënaqësie të votimit të këtij projektligji në ditën ndërkombëtare të lirisë së shtypit do të bojkotohet puna e institucioneve të Kosovë.

Sipas tij, presidentja ende nuk e ka pranuar Ligjin në fjalë dhe sipas afatit kushtetues pas tetë dite pritet një qëndrim zyrtar nga ana e presidentes për ndryshime të këtij Ligji.

Edhe Reporterët Pa Kufij e kanë dënuar ashpër Kodin e ri Penal të miratuar nga Kuvendi i Kosovës, në të cilin gjenden edhe dy nene që sipas kësaj organizate kriminalizojnë shpifjen dhe detyrojnë gazetarët që të zbulojnë burimet e tyre të informacionit në raste të procedimeve kriminale.

“Këto provizione janë të papranueshme. Ato qartazi kanë për synim heshtjen e atij lloji të gazetarisë dhe raportimit hulumtues që e bën qeverinë të ndihet jokomod”, thuhet në komunikatën e kësaj organizate.

Në komunikatë ndër të tjera thuhet se e drejta për të ushtruar gazetarinë dhe mbrojtur burimet e informacionit duhet të vazhdojë të jetë e parim thelbësor, duke shtuar se Kodi i ri Penal e vë lirinë e medias në rrezik dhe përfaqëson një sulm serioz kundër demokracisë.

Reporterët Pa Kufij i bëjnë thirrje presidentes Atifete Jahjaga të refuzojë nënshkrimin e këtij kodi penal dhe ta kthejë në Kuvend për të bërë ndryshimet që do të ishin në një vijë me standardet ndërkombëtare.