Jahjaga kërkon të mos bllokohen rrugët

Presidentja e Kosovës Atifete Jahjaga është shprehur e shqetësuar për paralajmërimin e Lëvizjes ‘Vetëvendosje’, për bllokimin e mallrave që hyjnë në Kosovë nga Serbia, dhe për bllokimin e pikave kufitare në Merdare dhe të Dheu i Bardhë.

Presidentja në deklaratën e saj thotë se e drejta e qytetarëve për të protestuar është e rregulluar me ligjet e Republikës së Kosovës dhe sipas saj organizimi i protestave paqësore nga një subjekt politik parlamentar, në këtë rast nga Lëvizja ‘Vetëvendosje’, ngërthen më vete përgjegjshmërinë për formën, qëllimin, zhvillimin dhe mbarëvajtjen e protestës.

“Si Presidente e Republikës së Kosovës angazhohem për mbrojtjen e kushtetutshmërisë dhe të ligjshmërisë, për adresimin e të gjitha çështjeve brenda institucioneve dhe në zbatim të plotë të ligjit. Përcaktimin e ‘Vetëvendosjes’ për të dalë në rrugë nuk e shoh si shterje të mundësive të veprimit brenda institucioneve të vendit”, thuhet në deklaratën e presidentes Jahjaga.

Presidentja Jahjaga shpreh qëndrimin e saj të fuqishëm, kundër veprimeve që pengojnë qarkullimin e lirë të njerëzve dhe të mallrave. Presidentja Jahjaga u bënë thirrje të gjithë qytetarët të mos bllokojnë rrugët, vendkalimet kufitare të Kosovës dhe të mos pengojnë qarkullimin e lirë të njerëzve dhe të mallrave.