BE-ja jep 26 rekomandime për zgjedhjet

Peterle ka kritikuar Komisionin e Pavarur për Media, për rolin pasiv gjatë fushatës, që pavarësisht ankesave dhe shkeljeve të raportuara gjatë fushatës zgjedhore, ky institucion nuk ka mbledhur fare bordin

Misioni për Vëzhgimin e Zgjedhjeve nga Bashkimi Evropian ka prezantuar raportin përfundimtar për zgjedhjet e 11 qershorit. Shefi i këtij misioni, Alojz Peterle, ka theksuar nevojën që të bëhet më shumë në edukimin e votuesve, trajnimin e të angazhuarve në vendvotime dhe qendrën e numërimit, si dhe rritje të transparencës së punës së KQZ-së.

Gjithashtu, Peterle ka kritikuar Komisionin e Pavarur për Media, për rolin pasiv gjatë fushatës, që pavarësisht ankesave dhe shkeljeve të raportuara gjatë fushatës zgjedhore, ky institucion nuk ka mbledhur fare bordin e as nuk ka marrë ndonjë vendim.

Raporti, bashkë me listën prej 26 rekomandimeve, i është dorëzuar edhe kryetares së KQZ-së, Valdete Daka, dhe është bërë e ditur se misioni do të jetë i angazhuar edhe në zgjedhjet lokale të 22 tetorit, me përafërsisht 100 vëzhgues.