Izraeli dërgon në Katar një delegacion për bisedime me Hamasin

Keystone EPA/DEBBIE HILL / POOL

Izraeli ka dërguar sot në Katar një delegacion për bisedime indirekte me Hamasin në lidhje me propozimin e fundit për një armëpushim në Gaza dhe një marrëveshje për çlirimin e pengjeve.

Zyra e Kryeministrit të Izraelit, Benjamin Netanyahu, ka bërë të ditur se ai kishte pranuar ftesën, ndërsa i ka cilësuar si të papranueshme ndryshimet që Hamasi kërkonte të bënte në një plan të paraqitur nga ndërmjetësuesit nga Katari, SHBA dhe Egjipti, përcjell albinfo.ch.

Ndryshe, mbrëmjen e së premtes, Hamasi tha se kishte dhënë një “përgjigje pozitive” ndaj propozimit për një armëpushim 60-ditor dhe se ishte gati për bisedime. Nga ana tjetër, një zyrtar i Hamasit deklaroi se grupi kishte kërkuar ndryshime përfshirë një garanci që nuk do t’u ktheheshin luftimeve nëse bisedimet për një armëpushim të përhershëm dështojnë.