Italianët interesohen për investime në Kosovë

Ministri Beqaj i ftoi afaristët italian që të investojnë në turizëm dhe miniera. Investitorët kanë shfaqur interesim për energjinë e ripërtërishme

Ministri i Zhvillimit Ekonomik, Besim Beqaj tha se Italia është një partner i natyrshëm i Republikës së Kosovës në fushën e bashkëpunimit ekonomik, derisa ftoi investitorët italian që të vijnë në Kosovë. Ai tha se në Qeveria e Kosovës ka krijuar një klimë të përshtatshme për investime.

Këto komente ministri Beqaj i bëri gjatë një takimi që zhvilloi në Prishtinë me një delegacion biznesmenësh nga Italia.

“Kosova qëndron në pozitë të avancuar sa i përket legjislacionit në fushën e investimeve krahasuar me vendet rajonit”, ka thënë Beqaj, ndërsa ka shpalosur projektet aktuale të cilat janë në zhvillim e sipër.

Nga ana tyre investitorët italianë kanë shfaqur interesin e tyre për investime në burimet e ripërtërishme të energjisë, miniera dhe industrinë ushqimore me ç’rast ministri Beqaj u ka shpjeguar procedurat e investimeve në këto fusha.

“Kosova ka një pozitë të favorshme në aspektin gjeografik dhe së fundi ka shënuar zhvillim në drejtim të përmirësimit të infrastrukturës fizike, e cila është parakusht për fuqizimin e sektorit privat në vend”, ka deklaruar ministri Beqaj, i cili afaristët italian i ka njoftuar edhe me sektorët e minierave dhe turizmit.