Itali: 78-vjeçari e vret shqiptarin pasi zbulon se kishte një lidhje me gruan e tij

Foto ilustrim

Një ngjarje e rëndë ka ndodhur ditën e djeshme në Itali. Një 45-vjeçar shqiptar u vra nga një 78-vjeçar.

Dritan H. u vra nga i moshuari Walter B., i cili edhe u arrestua.Vrasja ndodhi në afërsi të banesës së dorasit, në rrugën Varese, në Garbagnate Milanese, në veri të Milanos, në Itali.

Mediat italiane raportojnë se “viktima kishte lidhje jashtëmartesore me bashkëshorten e autorit të dyshuar”. Sipas informacioneve të para, thuhet se shqiptari frekuentonte shtëpinë ku jetonte i moshuari me gruan e tij, gjithashtu shqiptare, transmeton klankosova, përcjell albinfo.ch.

Në orën 03:00 të mëngjesit të djeshëm, 45-vjeçari kishte shkuar në gjendje të dehur në banesën e çiftit dhe sulmoi gruan, në prani të djalit të saj 11-vjeçar, të cilin ajo e kishte nga një lidhje e mëparshme, jo me bashkëshortin aktual. Ky i fundit reagoi dhe me një pistoletë Beretta 22 që mbante në shtëpi, qëlloi dy herë në ajër për të trembur viktimën, i cili doli nga apartamenti dhe zbriti shkallët, në tentativë për t’u larguar. Por, i moshuari vendosi ta ndjekë dhe zbriti me ashensor.

Në katin e parë të ndërtesës, ata u ndeshën sërish, ku pati edhe një përleshje fizike mes tyre para se italiani të shkrepte armën duke e lënë të vdekur në vend 45-vjeçarin. Plumbi e goditi në gjoks Dritan H., që rezultoi të ishte fatal.

Walter B. u arrestua nën akuzën e “Vrasjes me dashje”. Në dëshminë e parë dhënë policisë mediat raportojnë se 78-vjeçari pranoi se ai qëlloi pas sherrit me 45-vjeçarin.

Ndërkaq, ai dha po ashtu edhe një tjetër dëshmi për prokurorët, por nuk dihen shumë detaje. Në vendin e ngjarjes u konfiskua edhe arma “Beretta 22”, që dyshohet se është përdorur në rast.

Sa i përket viktimës, Dritan H. ishte me banim në Milano të Italisë dhe përveçse i papunë, rezultonte person me precedentë penalë në trafikun e lëndëve narkotike, shfrytëzimin e prostitucionit, si dhe për vjedhje.