Ish-futbollisti i Lepencit ndërroi jetë në Zvicër

Federata e Futbollit e Kosovës ka ngushëlluar familjen Shurdhani

Ish-futbollisti i Lepencit, Trimor Shurdhani, ka ndërruar jetë në Zvicër.

Shurdhani, i cili ishte nga Kaçaniku kishte shkuar në Zvicër, pasi disa vite më parë ai kishte pësuar një aksident të rëndë, përcjell albinfo.ch.

“Kryesia e KF LEPENCIT i shpreh ngushëllimet më të sinqerta Familjes së Halim Shurdhanit për ndërrimin e jetës së birit të tij, ish lojtarit të KF LEPENCIT” ka shkruar klubi.

Familjen e ka ngushëlluar edhe Federata e Futbollit e Kosovës. “Me dhimbje të thellë e morëm lajmin për ndarjen nga jeta të më të dashurit tuaj, Trimor Shurdhani, andaj më lejoni që në emrin tim, KE të FFK-së, klubeve dhe gjithë komunitetit të futbollit në Kosovë të ju shpreh ngushëllimet tona më të sinqerta. Trimori si ish-futbollist i KF “Lepenci” la gjurmë në futbollin kaçanikas dhe më gjerë, duke qenë gjithmonë i përkushtuar dhe një profesionist i vërtetë i sportit. Ai u shqua si një djalë shembullor, mik i shkëlqyeshëm e i afërt me të gjithë ata që e njohën dhe si i tillë do të kujtohet gjithmonë. Në këto momente të vështira të gjithë jemi pranë jush, për ta përballuar dhimbjen dhe humbjen e njeriut më të dashur për ju”, njofton FFK.

 

---