Irani ka deklaruar se është i gatshëm të rihapë Ngushticën e Hormuzit brenda 48 orëve, nëse Shtetet e Bashkuara të Amerikës pranojnë kushtet e paraqitura nga Teherani, përcjell albinfo.ch.
Zëdhënësi i Ministrisë së Jashtme iraniane, Esmaeil Baghaei, deklaroi të hënën, më 2 nëntor, se propozimi i ri parashikon një afat më të shkurtër për rikthimin e sigurisë në këtë rrugë strategjike detare.
Sipas tij, plani mund të zbatohet brenda dy ditëve, në vend të shtatë ditëve që ishin propozuar fillimisht në muajin shtator.
Baghaei theksoi se zbatimi i propozimit varet nga pranimi i kërkesave iraniane nga Uashingtoni.
Ndër kushtet kryesore të Teheranit janë përfundimi i bllokadës detare amerikane ndaj porteve iraniane, heqja e sanksioneve ndaj sektorit të naftës, lirimi i aseteve iraniane të ngrira jashtë vendit dhe përfundimi i luftës.
Ministri i Jashtëm iranian, Abbas Araghchi, ka kërkuar gjithashtu që SHBA-ja të pranojë një rrugë të re të kalimit të anijeve në Ngushticën e Hormuzit, të dakorduar ndërmjet Iranit dhe Omanit.
Ndërkohë, kontaktet diplomatike ndërmjet Teheranit dhe Uashingtonit po vazhdojnë përmes ndërmjetësuesve, përfshirë Katarin.
Pavarësisht përpjekjeve për arritjen e një marrëveshjeje, palët ende nuk kanë arritur një zgjidhje përfundimtare.
Ngushtica e Hormuzit është një nga rrugët më të rëndësishme detare për transportin ndërkombëtar të naftës dhe gazit. Kufizimet e lundrimit në këtë zonë kanë shkaktuar shqetësime për furnizimin global me energji.
Zhvillimet e fundit vijnë në një periudhë tensionesh të larta ndërmjet Iranit dhe SHBA-së, ndërsa përpjekjet diplomatike synojnë të shmangin përshkallëzimin e mëtejshëm të konfliktit.
