Investimet gjermane në Maqedoni

Shkëmbimet tregtare midis Maqedonisë dhe Gjermanisë gjatë 2011-ës arritën vlerën 1.48 milion euro

Kompanitë gjermane janë midis investuesve të parë më të mëdhenj në Maqedoni.

Zëvendësambasadori i Gjermanisë në Maqedoni dhe njëherësh përgjegjës për çështje ekonomike, Walter Leuchs thotë se Maqedonia e ka Gjermaninë partner strategjik në bashkëpunimin ekonomik.

Këmbimi tregëtar midis dy vendeve nga viti në vit shënon rritje. Investimet gjermane janë të orientuara në disa degë industriale, ndërsa në projektet ekonomike përfshihen rajone të ndryshme të Maqedonisë.

“Jemi të përfshirë me projekte edhe në rajonet të banuara nga shqiptarët. Këtu mund të theksoj projektin e fabrikës së allçisë KNAUF, që është projekt kryekëput gjerman, ku ka të punësuar mbi 200 punonjës”, thotë Walter Leuchs, transmeton DW.

Investitorët gjermanë kanë shprehur interesim për të investuar në disa zona të lira ekonomike në Maqedoni. Kështu është rasti me kompaninë “Kromber & Shubert”, që ka investuar në zonën e Manastirit. Por shumë kompani gjermane nuk i kufizojnë investimet e tyre vetëm në zonat e lira ekonomike.

Zëvendësambasadori gjerman Leuchs është i mendimit se Maqedonia i shfrytëzon shumë pak fondet e BE-së për bashkëpunim rajonal.

“Qeveria e Maqedonisë duhet të punojë më shumë në këtë drejtim dhe duhet t’i motivojë të interesuarit, sidomos bujqit që t’i shtrojnë me kohë kërkesat siç duhet deri tek institucionet përkatëse, me qëllim që t’i marrin ndihmat që iu takojnë.”, tha Leuchs.

Përfaqësues të qeverisë së Maqedonisë kanë shkuar disa herë në Gjermani për t’i informuar investuesit potencialë gjermanë për mundësitë që ofron Maqedonia.

Negociatat me kompanitë “Siemens” dhe “BMW” po shkojnë në drejtim të duhur dhe ndodhen në një fazë më të avancuar.

Sektorët ku pritet hyrja e kapitalit gjerman janë industria automobilistike, teknologjia informatiko-komunikuese, bujqësia, industria ushqimore, turizmi dhe burimet energjetike.