Investimet direkte shënojnë rekord në Shqipëri

Investimet e huaja direkte në Shqipëri gati arritën shifrën 1 miliard euro në vitin 2016 . Mediat në Tiranë e cilësojnë si një rekord të ri historik.

Sipas të dhënave, të publikuara në bilancin e pagesave, në vitin 2016 kompanitë e huaja investuan në ekonominë shqiptare saktësisht 983 milionë euro, ose 10.5 për qind më shumë se një vit më parë.

Siç raporton Top Channel në Tiranë nga të dhënat e detajuara tregojnë se ekonomia shqiptare ka përfituar dy nga projektet madhore në fushën e energjetikes, përkatësisht Gazsjellësi Transadriatik dhe kaskada e Devollit, të cilët kanë hyrë në fazën kulmore të punimeve.

Sipas Bankës së Shqipërisë, vetëm në tremujorin e katërt investimet në sektorin e energjisë dhe gazit ishin 166.5 milionë euro, ndërsa në total për të gjithë vitin shifra llogaritet në rreth 370 milionë euro.

Pas energjisë, në vendin e dytë sektori që ka marrë më shumë investime nga jashtë në ekonominë shqiptare rezulton industria nxjerrëse.

Vetëm në tremujorin e katërt kompanitë e huaja investuan 55 milionë euro në këtë sektor. Këtu bëjnë pjesë investimet në fushën e naftës, përkatësisht në vendburimin e Patos-Marinzës dhe kërkimet në zonën e Shpiragut.

Ndryshe nga sa ka ndodhur në vendet e tjera të rajonit, në Shqipëri investimet e huaja kanë patur një ecuri pozitive pavarësisht krizës.