Iniciativa kundër migracionit masiv, rrit shpenzimet e shtetit

Gattiker: "Në secilin rast individual do të duhej të bëhej verifikimi, dhe për këtë kërkohet një shumëfishim i personelit administrativ"

Më 9 shkurt zviceranët do të përcaktohen para kutive të votimit lidhur me iniciativën “Kundër migrimit masiv”.  Por, cilat do të ishin pasojat  në rast të pranimit të një iniciative të tillë nga populli votues? Sipas drejtorit të Entit Federal për Migracion (BFM), Mario Gattiker, kjo do të prodhonte më shumë burokraci, shpenzime dhe më shumë personel.

Ai e shpjegon këtë me disa procedura që do të bëheshin të domosdoshme në një rast të tillë. Ai merr si shembull kërkesën e iniciativës së përmendur të SVP/UDC-së që në secilin rast, për punësim t`u jepet përparësi vendësve (zviceranëve) para të huajve.

“Kjo do të kërkonte që në secilin rast individual të bëhej verifikimi , dhe për këtë do të nevojitej një shumëfishim i personelit administrativ në krahasim me këtë të sotmin”, ka thënë Gattiker në një intervistë për gazetën “Zentralschweiz am Sonntag”. Madje ka vazhduar ai, llogaritur sipas procedurës që ndiqet sot për të caktuar përparësinë që kanë vendorët ndaj të huajve të vendeve të treta, vënia e një rregulli të tillë për të gjithë të huajt do të kërkonte shqyrtimin e dhjetëfish më shumë dosjeve.

Për të realizuar këtë, entit do t`i nevojiteshin edhe 125 nëpunës më shumë se që ka tash. Ndërsa do të rritej edhe vëllimi i punës në nivelin e kantoneve dhe në përgjithësi do të kishte një ngritje të madhe të kostos.

Gattiker ka përkujtuar se po ashtu në rast të votimit pro iniciativës , Zvicra duhet të heqë dorë nga marrëveshja e Schengenit për lëvizje të lirë dhe ajo e Dublinit, për çështje të azilit. “Dhe në një rast të tillë, Zvicra sërish do të shndërrohej në një ishull azili”, ka tërhequr vërejtjen drejtori i BFM-së, Mario Gattiker.