Ikje të shpeshta, hetime për burgun në Orbe

Autoritetet kantonale po rishikojnë më mirë shkallën e sigurisë në këtë burg. Ato kanë nisur një procedurë hetimesh  

Gjashtë të burgosur kanë ikur të dielën nga burgu La Croisée në Orbe të kantonit Vaud. Katër prej tyre janë kapur vetëm pak më vonë ndërsa dy të tjerë ndodhen në arrati. Për këta të fundit, autoritetet e burgut thonë se nuk paraqesin rrezik.

Ndërkaq, burgu në Orbe ka zënë kryetitujt e gazetave për mungesën e theksuar të sigurisë: Vetëm tre muaj më parë (30 korrik) nga po ky burg patën ikur pesë të burgosur.

Pas ikjes së parë, ishin shtuar masat e sigurisë, por ikja e përsëritur tregon se masat kanë qenë të pamjaftueshme.

Kjo gjendje ka bërë që autoritetet kantonale të rishikojnë më mirë shkallën e sigurisë në këtë burg. Ato kanë nisur një procedurë hetimesh. Do të hetohen instalimet teknike, organizimi intern dhe kierarkia në personelin e burgut.

Një masë që do të merret me siguri, është shtimi i numrit të personelit të burgut, njoftojnë mediet.