I zbutet dënimi Taulant Xhakës

Është zbutur dënimi me tri ndeshje moslojë që i është shqiptuar javën e kaluar Taulant Xhakës. Futbollisti i FC Baselit dhe i kombëtares shqiptare, aktin e pahijshëm që kishte bërë duke e goditur me shuplakë  lojtarin kundërshtar (Renato Steffen) në ndeshjen me Young Boys të Bernës do ta “paguajë” me mungesën e tij në dy ndeshjet e  radhës të FC Baselit në superligë.

Pasi që njëra ndeshje tashmë është luajtur pa Xhakën, i bie që ai do të mungojë vetëm edhe në ndeshjen që vjen. Ndërsa sërish në fushën e gjelbër Taulanti do të paraqitet më 25 tetor, shkruajnë mediet zvicerane.

Gjyqtari i komisionit disiplinor e ka ndryshuar dënimin e shqiptuar më parë pasi që ai, veprimin e lojtarit shqiptar e ka cilësuar jo si goditje por si një sjellje të vrazhdë josportive.

Siç është raportuar tashmë, Xhaka, menjëherë pas përfundimit të ndeshjes e kishte goditur me shuplakë lojtarin e Young Boys, si përgjigje për provokimin që ai ia kishte bërë.