Hoxhaj: ndarja e Kosovës mund të ndodhë

Ministri i Punëve të Jashtme të Kosovës, Enver Hoxhaj, paralajmëron seriozisht se ndarja e Kosovës mund të ndodhë. “Rreziku është shumë real dhe kjo mund të ndodhë. Kjo varet nga reagimi i fuqive të mëdha për situatën në veri. Varet nga ajo sesi NATO-ja do të mbështesë prezencën e KFOR-it në pjesën veriore. 

Varet gjithashtu nga ajo se sa do të ketë presion diplomatik ndërkombëtar mbi Beogradin. Nëse nuk ka presion, realiteti është se ndarja e Kosovës do të ndodhë”, ka thënë Hoxhaj në një intervistë për agjencinë e lajmeve, Reuters.

Ministri Hoxhaj ka përsëritur qëndrimin e Kosovës se bazë e krejt problemeve është politika destrukive e Beogradit. Ai ka paralajmëruar se ndarja e Kosovës, hap Kutinë e Pandorës dhe mund të ketë pasoja për rajonin.

“Thelbi i problemit është se Serbia dëshiron ta ndajë Kosovën dhe ta marrë veriun. Ndarja do ta hapë kutinë e Pandorës ku josiguria, jostabiliteti dhe dhuna mund të përhapen në krejt rajonin në përmasa të paimagjinueshme”, ka pohuar kryediplomati kosovar. Qëndrimet e tij janë në kundërshtim me ato të kryeministrit Hashim Thaçi, që ka pohuar se skenari i Serbisë për ndarjen nuk mund të realizohet kurrë.