Hovenier: S’ka afat, por urgjencë për Asociacionin

Ambasadori i ShBA-së në Kosovë, Jeffrey Hovenier, thotë se nuk ka afat për themelimin e Asociacionit të Komunave me shumë serbe, por ka urgjencë.

“Ne do ta themi të njëjtën gjë, nuk ka shumë kohë për të humbur dhe është një ndjenjë urgjence për të lëvizur përpara me këtë, pasi situata është fragjile për momentin dhe sa më shumë progres që mund të arrijmë që të dyja palët të përmbushin të gjitha obligimet që kanë marrë nga këto dokumente (Marrëveshja e Brukselit dhe Aneksi i Oherit), situata do të ishte më pak fragjile”, tha Hovenier në një intervistë për “Atlantic Council”.

Ai shton se Kosova e ka të qartë që duhet t’i zbatojë obligimet që ka marrë përsipër.

“Qeveria e Kosovës ka qenë e qartë, ajo po ashtu do implementimin e plotë të të gjitha obligimeve nga Marrëveshja e Brukselit dhe Aneksi i Zbatimit”, tha Hovenier, përcjell albinfo.ch.