“House of Switzerland”, vitrina e Zvicrës në Forumin Ekonomik Botëror në Davos

Konfederata paguan 130 mijë franga për paraqitjen e Zvicrës në Forumin Ekonomik Botëror

Për një kohë të gjatë, Forumi Ekonomik Botëror (WEF) në Davos konsiderohej një ngjarje private, ku Zvicra zyrtare nuk paraqitej si nikoqire, por e shfrytëzonte vetëm për zhvillimin e takimeve dypalëshe me krerë shtetesh dhe ministra nga e gjithë bota, transmeton albinfo.ch.

Kjo qasje ndryshoi në vitin 2019, kur Zvicra nisi të paraqitet më dukshëm përmes “House of Switzerland”, një hapësirë e vendosur në lozhat e stadiumit të Hockey Club Davos, të rezervuara zakonisht për mysafirë VIP. Qëllimi i kësaj nisme është rritja e dukshmërisë ndërkombëtare të vendit, duke shfrytëzuar jehonën globale dhe mediatike të WEF-it.

Organizimi i “House of Switzerland” bëhet nga Präsenz Schweiz, institucioni i Konfederatës zvicerane përgjegjës për promovimin e imazhit të Zvicrës jashtë vendit. Kjo paraqitje, megjithatë, ka edhe kosto të konsiderueshme. Sipas të dhënave më të fundit mbi prokurimet federale, vetëm vitin e kaluar Konfederata i ka paguar Hockey Club Davos rreth 130 mijë franga zvicerane.

Edhe këtë vit, anëtarë të Këshillit Federal dhe përfaqësues të tjerë zyrtarë e përdorin “House of Switzerland” për aktivitete të ndryshme. Në këtë hapësirë zhvillohen takime mes këshilltarëve federalë dhe homologëve të tyre të huaj, mbahen konferenca për media, si dhe organizohen panele diskutimi mbi tema aktuale globale.

Ndër aktivitetet e këtij viti, sekretarja e shtetit për Ekonomi, Helene Budliger Artieda, ka zhvilluar një diskutim mbi industrinë farmaceutike me Severin Schwan, kryetar i bordit të kompanisë Roche. Në ambientet e “House of Switzerland”, mysafirëve u shërbehen edhe specialitete tradicionale zvicerane, si raclette.

“House of Switzerland është vitrina e Zvicrës në WEF”, ka deklaruar më herët Alexandre Edelmann, drejtor i Präsenz Schweiz. Sipas tij, kjo hapësirë u mundëson kompanive dhe organizatave të prezantojnë angazhimin e tyre në fushat e qëndrueshmërisë dhe inovacionit, duke forcuar imazhin e Zvicrës si një aktor i rëndësishëm në arenën ndërkombëtare.

Shtëpi të ngjashme mikpritjeje organizohen edhe gjatë Lojërave Olimpike, ku mblidhen sportistë, sponsorë, politikanë dhe përfaqësues të ekonomisë. Zvicra ka qenë e pranishme gjithashtu edhe në Expo 2025 në Osaka.

Përveç këtyre aktiviteteve, Präsenz Schweiz është përgjegjëse edhe për dhuratat zyrtare të Konfederatës. Për periudhën 2025–2028, janë blerë, ndër të tjera, thika Victorinox në vlerë prej 500 mijë frangash zvicerane, të destinuara për aktivitete dhe takime zyrtare./Albinfo.ch

---