Hoti: Askush nuk ka mandat të negociojë për shkëmbim të territorit

Në ditën kur pritet të mbahet takimi mes dy presidentëve, të Serbisë dhe Kosovës, do të ketë edhe seancë të jashtëzakonshme.

Shefi i Grupit parlamentar të LDK-së, Avdulla Hoti, ka njoftuar se një seancë e jashtëzakonshme e Kuvendit do të mbahet para datës 7 shtator,  kur pritet të ndodhë takimi i presidentëve Thaçi-Vuçiq në Bruksel.

“Sot kemi marrë mbështetjen nga Vetëvendosje dhe nga PSD për seancë të jashtëzakonshme të Kuvendit të Kosovës.

Në këtë seancë do të propozohet për miratim rezoluta me vetëm një pikë, ku konfirmohet se territori i Kosovës është një dhe i pandashëm dhe se askush nuk ka mandat të negociojë për territorin e Kosovës”, ka shkruar Hoti në Facebook.

Ai ka deklaruar se pazare me shtetin e Kosovës nuk mund të bëjë askush.

Ka paralajmëruar se në ditët në vijim do të kërkojmë mbështetjen edhe të grupeve të tjera parlamentare, si dhe të shoqërisë civile.