Haradinaj, i palëkundur për mosheqjen e taksës

Kryeministri i Kosovës, Ramush Haradinaj, ka ripërsëritur se taksën doganore prej 100% ndaj Serbisë dhe Bosnjë e Hercegovinës nuk do ta heqë.

Në një vizitë në kompleksin memorial në Gllogjan, Haradinaj ka thënë se sa të jetë kryeministër, taksa nuk do të hiqet.

“Shpresoj më dëgjuat shumë mirë. Po e shihni ku kam ardhur për ta thënë. Sa jam unë kryetar qeverie, taksa nuk hiqet”, tha Haradinaj.

Ai po kërkon që Kosova të njihet nga Serbia si kusht i heqjes së taksës.

“Nëse ne fillojmë të bëjmë hapa prapa, njëherë kërkohet të hiqet tarifa, nesër mund ta kërkojnë të hiqet Trepça, të hiqet Ushtria, të hiqet diçka tjetër”, ka thënë Haradinaj.

Kryeministri Haradinaj gjithashtu ka thënë edhe se në lidhje me taksën kërkon përkrahjen e partnerëve politikë, më saktësisht, të koalicionit qeverisës.

“Kërkoj përkrahjen edhe të partnerëve politikë, edhe pse mund të kemi mendime të ndryshme. Një gjë është e vërtetë, kur e kemi marrë vendimin për taksën, kemi qenë unanim, pra secili ka thënë po. Nuk është mirë askush të provojë të heqë taksën, pa thënë secili po”, ka thënë kryeministri Haradinaj.

Gjatë ditës së sotme, shefja e diplomacisë evropiane, Frederica Mogherini, ka kërkuar që taksa të hiqet që të vazhdojë dialogu.