Haradinaj e çon në Kuvend letrën e dorëheqjes

Keystone (AP Photo/Jean-Francois Badias)

Kryeministri në dorëheqje, Ramush Haradinaj, sot ka dorëzuar në Kuvendin e Kosovës letrën e dorëheqjes, përcjell albinfo.ch.

Veprimin e ka bërë të ditur vetë Haradinaj përmes një postimi në Facebook.

“Sot, përmes një letre, i kam njoftuar krerët e institucioneve dhe liderët e partive politike të përfaqësuara në Kuvend, për vendimin e dorëheqjes sime të parevokueshme nga funksioni i Kryeministrit të Republikës së Kosovës. Në përputhje me Kushtetutën e Republikës së Kosovës dhe ligjet e aplikueshme, kam ftuar që të ndërmerren hapat e nevojshëm për shpalljen e zgjedhjeve të përgjithshme nacionale, në mënyrë që e drejta për të zgjedhur t’i kthehet sovranit”, ka shkruar ai.

Po ashtu, Haradinaj ka bërë të ditur se deri në zgjedhjen e Qeverisë së re do të vazhdojë t’i kryejë detyrat kushtetuese si kryeministër dhe Qeveri në dorëheqje.

Rikujtojmë se Haradinaj e ofroi dorëheqjen nga posti i kryeministrit, pasi, siç njoftoi ai, është ftuar në Hagë si i dyshuar.