Hana Orllati kalon fazën e dueleve në “The Voice of Finland”

Pas një performance të fuqishme me këngën e Celine Dion, talentja nga Kosova vazhdon garën në ekipin e reperit Elastinen (Video)

Këngëtarja shqiptare nga Kosova, Hana Orllati, ka kaluar me sukses edhe fazën e dytë të spektaklit të njohur muzikor “The Voice of Finland”, atë të dueleve, duke vazhduar kështu rrugëtimin e saj në këtë garë prestigjioze ndërkombëtare, transmeton albinfo.ch.

Në këtë fazë, Hana u përball në një duet me kandidaten finlandeze Kreetta Sihvola, me të cilën interpretuan këngën e njohur “It’s All Coming Back To Me Now” të Celine Dion. Performanca e tyre u vlerësua si një ndër interpretimet më të spikatura të kësaj faze të spektaklit, duke marrë reagime shumë pozitive.

Mentorja e të dy kandidateve, këngëtarja Jenni Vartiainen, vendosi të zgjedhë Kreetta Sihvola për të vazhduar garën në ekipin e saj. Megjithatë, sipas rregullave të formatit të “The Voice of Finland”, mentorët e tjerë kanë të drejtë të “vjedhin” një konkurrent nëse vlerësojnë potencialin e tij. Kështu ndodhi edhe me Hanën. Dy anëtarët e tjerë të jurisë, Elastinen dhe Sanni, shprehën interes për ta pasur atë në ekipet e tyre, duke vlerësuar zërin dhe performancën e saj në skenë. Në fund, Hana vendosi t’i bashkohet ekipit të reperit Elastinen, duke siguruar kështu vazhdimin e saj në garë. Performanca e Hanës u dallua veçanërisht për emocionin dhe interpretimin e ndjerë që ajo i dha këngës, duke bërë që mentorët të shfaqin menjëherë interes për ta përfshirë në ekipet e tyre.

Rrugëtimi i Hanës në muzikë ka nisur që në moshë të hershme. Që në moshën 10-vjeçare ajo mori pjesë në “The Voice Kids Albania”, ndërsa më pas ka performuar në shumë koncerte për fëmijë në Kosovë. Në fazën e parë të “The Voice of Finland”, Hana arriti të kalojë me sukses audicionet e fshehta me interpretimin e këngës “How Am I Supposed to Live Without You”, duke dëshmuar talentin dhe potencialin e saj artistik.

Hana Orllati ka përfunduar shkollën e mesme të muzikës “Prenk Jakova” në Prishtinë. Për të, muzika mbetet pasioni dhe frymëzimi më i madh, ndërsa këngëtarja e re premton se në të ardhmen do të sjellë edhe projekte të reja muzikore për publikun./Albinfo.ch

https://www.facebook.com/reel/946072421702451

---