Hagë: Kërkohet që Thaçit, Veselit dhe Selimit t’u pezullohen të gjitha vizitat dhe komunikimet

Keystone (Koen van Weel/Pool via AP)

Zyra e Prokurorit të Specializuar në Hagë ka kërkuar që Hashim Thaçit, Kadri Veselit dhe Rexhep Selimit t’u pezullohen vizitat dhe të gjitha komunikimet përveç me avokatët e tyre, ndërsa lihet mundësia e lejimit vetëm për një listë të ngushtë personash, të cilët duhet të aprovohen paraprakisht nga trupi gjykues.

ZPS-ja ka thënë se të tre kanë bërë shkelje duke zbuluar identitetet e dëshmitarëve të mbrojtur dhe duke ua shpërndarë përmbajtjen e dëshmive konfidenciale personave që i kanë vizituar në Qendrën e Paraburgimit, teksa u tha se hetimet kanë zbuluar që po ashtu ka pasur përpjekje të mëtutjeshme për t’i udhëzuar dëshmitarët se si të dëshmojnë, shkruan albinfo.ch.

Me këtë rast, prokuroria ka kërkuar që tre të akuzuarve t’u pezullohen të gjitha komunikimet, ato virtuale si dhe vizitat fizike, dhe që një gjë e tillë të jetë në fuqi deri në një vendim të trupit gjykues ndërsa ZPS-ja ka urdhëruar që ata të monitorohen në mënyrë aktive në të gjitha komunikimet e joprivilegjuara dhe që ato të dhëna të ruhen deri në fund të gjykimit, sipas KlanKosova.