Grubi – Hulmann: Rruga e BE-së për Maqedoninë e Veriut hapet me propozimin francez

Fb - Artan Grubi

Zëvendëskryetari i parë i Qeverisë dhe ministër për Sistem Politik dhe Marrëdhënie Ndërmjet Bashkësive, z. Artan Grubi, është takuar sot me ambasadoren e Zvicrës, znj. Véronique Hulmann, transmeton albinfo.ch.

Përmbajtja e propozimit franceze, protestat kundër këtij propozimi dhe sfidat e rrugës së integrimit të vendit, ishin disa nga temat që u diskutuan gjatë takimit.

Ambasadorja Hulmann u informua nga zëvendëskryetari i parë i Qeverisë, z. Grubi, për procesin transparent rreth propozimit francez dhe bashkë konstatuan nevojën e kompaktësisë vepruese dhe angazhimit të gjithanshëm të gjithë aktorëve politikë, botës akademike, sektorit civil dhe të gjithë qytetarëve për tejkalimin e sfidave, pasiqë është koha të triumfojë racionaliteti ndaj protagonizmit subjektiv.

“Është jashtëzakonisht e rëndësishme të zhbllokohet rruga e integrimit përmes shqyrtimit konstruktiv dhe të gjërë të propozimit francez, të cilit i qëndrojnë në mbështetje 27 vendet e BE-së, i cili nuk cenon veçoritë identitare, kulturore, gjuhësore, historike të bashkëkombasve tanë”, ka thënë Hulmann.

Grubi dhe ambasadorja Hulmann në fokus të bisedës kishin edhe reaksionet që shkaktoi publikimi i përmbajtjes së propozimit, me ç’rast Grubi dënoi dhunën e përdorur në protestat e organizuara, të cilat u cilësuan si të panevojshme, antieuropiane dhe të dëmshme për destabilizimin e vendit, transmeton albinfo.ch.