Gruaja nga Kosova vdes në banjën termale në Elbasan

Një grua ka vdekur dhe bashkëshorti i saj është në gjendje të rëndë shëndetësore pas vizitës që ata kishin bërë në banjën termale, Llixha në Elbasan.

“Rreth orës 03:30, në Spitalin e Elbasanit është dërguar e vdekur shtetasja E. I., 60 vjeç, banuese në Plloshan, Kosovë, si dhe në gjendje të rëndë shëndetësore bashkëshorti i saj, shtetasi J. I., 70 vjeç, të cilët kishin ardhur për të bërë banja termale në Llixha Tregan Elbasan dhe ishin akomoduar në hotelin e shtetasit N.K.”, thuhet në komunikatën e policisë, njofton TCH.

Pas kontrolleve të kryera nga mjeku ligjor është konstatuar se në trupin e viktimës nuk ka pasur shenja dhune, kurse grupi hetimor po punon për zbardhjen e plotë të rrethanave të kësaj ngjarjeje, përcjell albinfo.ch.

Ka qenë bashkëshorti i saj, i cili pasi e ka parë ç’kishte ndodhur, ka pësuar gjendje shoku.

Ai kishte dalë për një shëtitje jashtë dhe kur ishte kthyer në hotel, gruaja nuk po i hapte derën dhe as nuk i përgjigjej.

Ai e ka shkelmuar derën dhe më pas ka parë skenën e rëndë.

Nuk dihet se çfarë e ka shkaktuar vdekjen e 60-vjeçares me inicialet E.I. Burri i saj J.I, 70 vjeç, është dërguar me urgjencë në Qendrën Spitalore në Tiranë, ndërsa trupi i gruas ndodhet ende në morgun e Spitalit të Elbasanit.