Gjermania, shteti ku shqiptarët po gjejnë gjithnjë e më shumë mundësi pune

Rreth 20 mijë shqiptarë në vit po largohen me leje pune drejt BE-së: Ikja po bëhet më zyrtare se kurrë

Emigracioni nga Shqipëria drejt vendeve të Bashkimit Europian po shfaqet gjithnjë e më shumë në një formë të rregullt dhe të dokumentuar – përmes lejeve të punës. Të dhënat e Eurostat tregojnë një rritje të ndjeshme të numrit të lejeve të qëndrimit dhënë për arsye punësimi për shtetas shqiptarë, sidomos pas vitit 2021, përcjell albinfo.ch.

Nga viti 2022 deri në vitin 2024, janë dhënë mesatarisht 20 mijë leje pune në vit, krahasuar me vetëm 3-4 mijë në vit një dekadë më parë. Në total, gjatë periudhës 2021–2024, BE ka dhënë rreth 72 mijë leje qëndrimi për punë për shqiptarët, duke dëshmuar një zhvendosje të qartë nga emigracioni informal dhe kërkesat për azil, drejt kontratave të rregullta të punës.

Kryesojnë Greqia, Gjermania dhe Italia

Në vitin 2024, Greqia rezulton destinacioni kryesor me rreth 7.200 leje pune të dhëna për shtetas shqiptarë, e ndjekur nga Gjermania, e cila po tërheq gjithnjë e më shumë profesionistë në fushën e shëndetësisë dhe teknologjisë, me rreth 4.500 leje në vit. Italia, një destinacion tradicional për shqiptarët, vijon të japë rreth 3.000 leje pune në vit.

Ndërkohë, edhe vende më të vogla si Kroacia dhe Malta po bëhen gjithnjë e më të pranishme në hartën e emigracionit shqiptar. Kroacia ka ofruar 1.400 deri në 2.000 leje pune në vit, kryesisht në sektorin e ndërtimit dhe turizmit, ndërsa Malta – e cila dikur ishte një destinacion në rritje – ka përgjysmuar lejet e dhëna në 2024, duke zbritur në rreth 500.

Nga azili te emigracioni i rregullt

Krahasuar me vitet e mëparshme, kërkesat për azil nga shqiptarët janë në rënie të ndjeshme. Në 2022 u regjistruan rreth 15 mijë kërkesa për azil, ndërsa në 2023 ky numër ra në 11 mijë, dhe në 2024 zbriti më tej në 9.300. Kjo do të thotë se numri i shqiptarëve që po largohen përmes kanaleve zyrtare të punësimit është tashmë pothuajse dyfish në raport me ata që kërkojnë azil.

Sipas të dhënave të INSTAT, ky emigracion “i dukshëm” përbën një përqindje të konsiderueshme të fuqisë punëtore në sektorin privat jo-bujqësor në Shqipëri – rreth 13% – dhe ka nisur të ndikojë ndjeshëm tregun e punës në vend, sidomos në sektorët ku kërkesa për punonjës është më e lartë.

Një sfidë për ekonominë shqiptare

Kjo valë e re emigrimi, ndonëse më e rregulluar, po krijon boshllëqe të theksuara në tregun vendas të punës. Bizneset shqiptare po përballen me vështirësi gjithnjë e më të mëdha për të gjetur punonjës, duke penguar jo vetëm funksionimin e përditshëm, por edhe planet për investime dhe zgjerim afatgjatë.

Ndërkohë që emigrimi ekonomik i strukturuar shihet si një mundësi për zhvillim individual dhe për përmirësim të kushteve të jetesës, rritja e tij e pandalshme e vendos Shqipërinë përballë një sfide serioze demografike dhe sociale, e cila kërkon adresim strategjik dhe të qëndrueshëm në nivel politikash kombëtare.

---