Gjermania ndan gjysmë miliardi më shumë për qytetet e ndotura

Keystone EPA/FRIEDEMANN VOGEL

Qeveria e Gjermanisë do të ndajë një gjysmë miliardi euro shtesë për të përmirësuar cilësinë e ajrit në qytetet e ndotura nga karburantet e automobilave, tha kancelarja gjermane, Angela Merkel, shkruan albinfo.ch.

Fondi aktual i një miliard eurove do të rritet në 1.5 miliard euro.

Merkel publikoi informacionin pas një takimi në Berlin me përfaqësuesit e qyteteve dhe lagjeve.

“Qëllimi i këtyre bisedimeve ishte të shmanget vendosja e ndalimeve shtesë mbi makinat e vjetra të naftës në zonat urbane, ku u regjistrua një ndotje e madhe”, raportoi DPA.

Debati për cilësinë e ajrit në qytetet gjermane filloi pas skandalit në vitin 2015, kur Volkswagen pranoi se ka futur softuer të paligjshëm në automjetet e veta që mbulonin emisionet reale të gazrave të dëmshme.