Gjermania mund t’i dëbojë refugjatët në vendet tjera të BE-së

Gjykata Evropiane e Drejtësisë vendosi se Gjermania mund të dëbojë më lehtë azilkërkuesit në vendet e tjera evropiane.

Vendimi shqyrtoi rastin e një burri nga Gambia, i cili fillimisht kishte aplikuar në Itali, por më vonë paraqiti një kërkesë tjetër në Gjermani, përcjell albinfo.ch.

Ai për të sfiduar dëbimin, ka thënë se do të ishte në kundërshtim me ligjin e BE-së të dëbohej për shkak të kushteve të këqija në Itali dhe mangësive në procedurën e azilit në Itali. Ky person kishte argumentuar se një riatdhesim në Itali do të çonte në varfëri, shkruan “The Local”.

Gjykata, megjithatë, gjeti që dëbimi ishte i justifikuar nën parimin e “besimit të ndërsjellë” midis vendeve evropiane.

Kjo do të thotë që asnjë transferim nuk mund të parandalohet nëse aplikuesi nuk mund të provojë se një veprim i tillë do ta ekspozonte atë në “varfëri materiale ekstreme”, që është në kundërshtim me ndalimin e Konventës Evropiane për të Drejtat e Njeriut për “trajtim çnjerëzor ose degradues”.