Gjermania këmbëngulë: Kosovarët të riatdhesohen

Ministrja për Çështje Evropiane dhe Marrëdhënie Rajonale e Bavarisë, Beate Merk tha se kosovarëve u është ndërprerë mbështetja financiare dhe pritet kthimi i tyre në atdhe 

Qytetarët e Kosovës që janë ndalur në rajonin e Bavarisë do të kthehen më vendlindje pasi që Kosova është një vend i sigurt dhe se kosovarëve nuk iu takon e drejta për azil. Kështu është thënë pas një takimi që ministri i Punëve të Brendshme i Kosovës, Skender Hyseni, ka zhvilluar me ministren për Çështje Evropiane dhe Marrëdhënie Rajonale të Bavarisë, Beate Merk.

Sikurse në takimin e parë, që ministri Hyseni pati gjatë muajin shkurt të këtij viti me  Merk, u theksua se në Gjermani nuk ka azil për kosovarët.

Gjithashtu, u konfirmua se azilkërkuesve kosovarë në Landin e Bavarisë i është bërë ndalimi i përkrahjes financiare për faktin se kërkesat për azil të kosovarëve do të procedohen brenda dy javësh.

Ministri Hyseni ritheksoi se liberalizimi i vizave për Republikën e Kosovës dhe punësimi sezonal i kosovarëve në Gjermani, do të mund të ndalte migrimin ilegal të qytetarëve. Hyseni dhe ministrja Merk, biseduan po ashtu për mundësinë e investimeve në Kosovë nga Republika e Bavarisë, në kuadër të përpjekjeve që qeveria Mustafa po bën për të tërhequr investitorët nga jashtë.