Gjermani ka paguar mbi 80 mijë euro për veshkën nga Medicus-i!

ZDF thotë se një gjerman që e ka blerë veshkën e siguruar në rrugë kriminale, i ka paguar për të 81892 euro një ndërmjetësuesi izraelit

Një veshkë e siguruar nga spitali “Medicus” i Prishtinës, ka gjetur rrugën deri në Gjermani, respektivisht në landin Nordrhein Westfallen (NRW). Ky është përfundimi që ka nxjerrë  magazina televizive e kanalit gjerman ZDF “Frontal21”

Bazuar në akuzën e bërë nga EULEX-i, raporton “Frontal21”, gjermani që e ka blerë veshkën e siguruar në rrugë kriminale, i ka paguar për të 81892 euro një ndërmjetësuesi izraelit. Ndërsa dhuruesja e veshkës ka qenë një grua 50 vjeçare nga një vend i papërcaktuar i Evropës Lindore. Por, marrësi i veshkës deri më tash, sipas ZDF, ka refuzuar të dëshmojë.

Klinika në të cilën janë bërë operacionet ilegale të nxjerrjes së organeve, është bashkëfinancuar edhe nga gjermanët. Hulumtimet e redaksisë së emisionit kanë ardhur në konstatimin se njëri ndër bashkëthemeluesit e klinikës “Medicus” është edhe një urolog gjerman, Por, urologu në fjalë, mohon çdo implikim të tij në këtë biznes.

Autoritetet e ndjekjes penale kanë ngritur akuzën për veprën penale të trafikut të dyshuar të organeve. Sipas raportit të ZDF, gjatë vitit 2008 në klinikën Medicus janë kryer gjithsej 19 nxjerrje organesh dhe 10 transplantime të organeve. hetuesit gjatë po atij viti kanë zbuluar një rrjet ndërkombëtar të përbërë prej mjekëve dhe ndërmjetësve, të cilët kërkonin dhurues të organeve, në vende të varfra.

Në hetimin e rastit, sipas raportit, ka punuar edhe drejtësia gjermane. “Një prokurori gjermane ka provuar dy herë që ta marrë në pyetje pranuesin e veshkës nga NRW, por ai ka kundërshtuar”, është shprehur redaktori i magazinës “Frontal21”.