Gjendet shëndosh e mirë vajza që ishte shpallur e zhdukur

Edhe pasi që shoqet e saj kishin zbritur të gjitha, ajo e kishte vazhduar rrugën për një stacion më të largët. Kjo gjë i kishte rënë në sy shoferit të autobusit i cili pastaj kishte alarmuar policinë

Të enjten, mediet gjermane dhe pas tyre edhe ato në gjuhen shqipe kishin publikuar lajmin për zhdukjen e një vajze 12 vjeçe refugjate nga Kosova. Lindita, siç quhet vajza, së bashku me prindërit ka ardhur nga Kosova para dy muajve dhe banonte në një kamp azilkërkuesish në Osttönnen në landin NRW.

Pasi që nuk ishte kthyer nga shkolla në kohën e zakonshme, familjarët e saj rreth orës 17.30 e kishin alarmuar policinë duke e trajtuar vajzën si të zhdukur. Policia me një mobilizim të madh, duke angazhuar edhe qentë nuhatës policorë ka nisur një aksion të gjerë të kërkimit.

Më vonë është konstatuar se Lindita kishte vazhduar rrugën me autobus për në qytet së bashku me shoqet e shkollës. Por, edhe pasi që shoqet e saj kishin zbritur të gjitha, ajo e kishte vazhduar rrugën për një stacion më të largët. Kjo gjë i kishte rënë në sy shoferit të autobusit i cili pastaj kishte alarmuar policinë.

Pasi që vajza nuk e njihte gjuhën dhe nuk mundte të komunikonte në gjuhën gjermane, atë fillimisht e kishin strehuar në një shtëpi për strehimin e vajzave në Neheim. Kur, pasditen e djeshme të vonë lajmi për zhdukjen e saj ishte bërë i njohur përmes medieve, vajza mundi të identifikohej, shkuan soesteranzeiger.de.

Policia e ka dërguar Linditën shëndosh e mirë mbrëmë rreth orës 0.30 te familja e saj në Ostönnen, e cila e ka pritur vajzën me një lehtësim të madh