Gërvalla i reagon NZZ-së zvicerane: Keni botuar gënjeshtra

Ajo tha se në artikullin e intervistës së saj, mediumi ka pohuar “gënjeshtra se Ushtria Çlirimtare e Kosovës ka kryer vrasje të pasluftës”

Ministrja e Punëve të Jashtme dhe Diasporës, Donika Gërvalla-Schwarz, i ka reaguar gazetës zvicerane “NZZ”, të cilës i ka dhënë një intervistë. Ajo tha se në artikullin e intervistës së saj mediumi ka pohuar “gënjeshtra se Ushtria Çlirimtare e Kosovës ka kryer vrasje të pasluftës”.

Gërvalla ka sqaruar se UÇK-ja është shpërbërë pas përfundimit të luftës.

“NZZ publikoi pohimin e rremë se UÇK-ja kreu vrasje pas përfundimit të luftës. UÇK u shpërbë pas çlirimit të Kosovës në qershor 1999. Nëse krimet thuhet se janë kryer, ato bëhen nga individë, jo nga UÇK-ja”, ka shkruar kryediplomatja kosovare.

“Gjatë gjenocidit në Kosovë, burra dhe gra të panumërta në UÇK, FARK dhe të tjerët sakrifikuan jetën e tyre për të shpëtuar civilë të pafajshëm nga asgjësimi serb. Liria e medias gjithmonë duhet të mbrohet. Por, kështu është e vërteta”, ka shkruar tutje Gërvalla.

 

---