Gazetari gjerman i thur lavde burgut të Zvicrës

Ai ka shpëtuar pa paguar gjobën prej 350 frangash për shkeljen e ligjit dhe nga ana tjetër ka “fituar” 400 franga, sa i kushtojnë shtetit 2 ditë qëndrimi në burg

Një gazetar gjerman ka bërë një shkelje të vogël të rregullave të komunikacionit në një autostradë të Zvicrës. Për këtë shkelje, policia i ka sjellë një dënim prej 350 frangash, gjobë kjo e cila gazetarit nga Gjermani Philipp Mausshardt i ishte dukur shumë e lartë. Në vend se ta paguante gjobën, ai zgjodhi qëndrimin për dy ditë në burg.

Pikërisht kjo aventurë e shkurtë në burgun zviceran Bachtel është shndërruar në një rrëfim të lezetshëm për mediet zvicerane. Në një raportim nga “vuajtja” e dënimit, të botuar në “NZZ m Sonntag” gazetari i revistës gjermane “Stern” Mausshardt ka shkruar për përditshmërinë e një burgu. Dhe kjo përditshmëri si duket i ka pëlqyer bukur shumë gjermanit.

Ndërkohë, rrëfimin e tij e kanë publikuar ose me të kanë zhvilluar intervista edhe një numër gazetash tjera zvicerane.

Qelitë gjatë tërë ditës janë të hapura, të burgosurit e kalojnë kohën në hapësirat për duhan ose për lojë të biliardit. Ndërsa, siç shkruan gazetari gjerman, në secilën dhomë ishte nga një televizor me ekran të rrafshët dhe me 42 programe në dispozicion. Më shumë programe se sa u ofrojnë shumica e hoteleve mysafirëve të tyre kundrejt pagesës

Në rrëfimin e gazetarit për qelinë ku ka qëndruar, “nuk guxon” të mungojë edhe një shqiptar! Kosovari me emrin Mustafa duket t`i ketë ofruar atij drogë, të cilën, sipas tij, nuk ishte fare e vështirë ta siguronte në këtë burg.

Dhe në fund, hesapi gazetarit gjerman i ka dalë fare mirë:  një ditë e një të burgosuri, burgut Bachtel i kushton 200 franga. Po të llogaritësh se ka “shpëtuar“ pagesën prej 350 frangash për shkeljen e ligjit dhe nga ana tjetër ka “fituar” 400 franga, sa kushton qëndrimi në burg, Mausshardt thotë të ketë dalë i kënaqur me gjithë ketë “biznes”.