Gashi-Majko: Dy qeveri, një diasporë shqiptare

Ministri kosovar i Diasporës, Dardan Gashi, ditën e dytë të vizitës në Shqipëri është pritur nga homologu i tij, Pandeli Majko, me të cilin kanë diskutuar për detyrimet që kanë karshi diasporës, si dhe për projektet që dy Ministritë do t’i udhëheqin në të ardhmen në të mirë të diasporës shqiptare.

Në njoftimin për media thuhet se të dy janë dakorduar që diaspora shqiptare është unike dhe e pandarë, potenciali i së cilës duhet të promovohet si dhe të shërbejë në avancimin e bashkëpunimit të mëtejmë mes institucioneve, përcjell albinfo.ch.

“Jemi dy shtete që përfaqësojmë një diasporë. Duke thënë këtë, dihet që organizimi i diasporës bëhet bashkë, pavarësisht prejardhjes dhe ky organizim ka rezultuar me një migracion shumë të suksesshëm”, ka thënë Majko.

Ndërsa Gashi ka thënë se të dy i presin shumë punë së bashku. Gjatë takimit u diskutua edhe për tri marrëveshjet që presin të nënshkruhen në mbledhjen e dy qeverive më 27 nëntor në Korçë, për bashkëpunim në fushën e diasporës dhe migracionit.