Frikë nga përhapja e Omicron, OBSH: Anuloni eventet festive

(KEYSTONE/Alexandra Wey)

Miliona evropianë shpresojnë të kenë një fundjavë festive mes familjes dhe miqve, por për të dytin vit me radhë kujdesi duhet të jetë maksimal.

Në kohën kur po rritet numri i të infektuarve me variantin Omicron, OBSH rekomandon që të anulohen të gjitha eventet festive. Është një mesazh që nuk do të donit ta dëgjoni.

“Të gjithë jemi të lodhur nga kjo pandemi. Të gjithë ne duam të kalojmë kohë me miqtë dhe familjen. Por, një event i anuluar është më mirë sesa një jetë e humbur.  Është më mirë të anulojmë tani dhe të festojmë më vonë. Askush nuk dëshiron të jetë sërish këtu pas 12 muajsh”, u shpreh Adhanom Ghebreyesus, Drejtor i Përgjithshëm i OBSH-së.

Ndonëse vijojnë fushatat e vaksinimit, shumë qeveri po rikthejnë edhe izolimin, Holanda është tanimë në shtetrrethim.

Në Zvicër forcohen masat, nga 20 dhjetori  të gjithë ata që munden duhet të punojnë nga shtëpia.

Në landet gjermane po rimendohen kufizime pas Krishtlindjes, të cilat do të përfshijnë edhe ata që janë vaksinuar apo shëruar.

“Për shembull, mund të reduktojmë grupet. Në Bavari janë mbyllur baret dhe klubet për të shmangur pikat e infektimit dhe përhapjen e shpejtë që shkaktojnë eventet”, u shpreh Hendrick Streeck, ekspert i COVID në qeveri.

Kancelari Olaf Scholz shprehet se vendi në fund të vitit do të arrijë objektivin për të vaksinuar të paktën 30 milionë qytetarë.