Frangu zviceran do të përfitojë nëse Britania e braktis Evropën

“Brexit” është i një rëndësie të madhe për Evropën. Është vlerësuar se nëse Britania e Madhe do të dalë nga BE-ja, do të dobësohet paundi nga 15 në 20 për qind, duke e dobësuar edhe euron, thonë analistët nga banka HSBC.

“Sipas mendimit tonë, frangu zviceran është mbrojtja më e mirë në këto zhvillime. Në një atmosferë të rrezikut që bart me vete Brexit, monedha zvicerane është konsideruar si një strehë e sigurt”, ka thënë David Bloom, kreu i Departamentit analitik të HSBC.

Monedha britanike tashmë vuan pasojat e referendumit të pasigurt të planifikuar më 23 qershor të këtij viti. Muajin e kaluar paundi ka rënë në nivelin më të ulët në shtatë vjet kundrejt monedhës amerikane, pra nën nivelin e 1.39 dollarëve.

Analistët besojnë se frangu zviceran do të përfitojë nëse Britania braktis BE-në dhe në rast të rezultatit të kundërt, frangu nuk do të ketë ndonjë pasojë.