Franca nuk u jep azil kosovarëve

Ministri i Rendit, Bajram Rexhepi dhe ambasadorja e Francës në Kosovë, Maryse Daviet iu bënë thirrje kosovarëve që mos shkoni në Francë se nuk ka azil për kosovarët

Informatat që janë dhënë kohën e fundit se gjoja Franca njeh automatikisht të drejtën për azil për qytetarët e Kosovës nuk është e saktë dhe nuk përputhet fare me realitetin. Kështu u tha të premten pas një takimi që zhvilloi ministri kosovar i Punëve të Brendshme, Bajram Rexhepi dhe ambasadorja e Francës në Kosovë, Maryse Daviet.

Në këtë takim u tha se Qeveria Franceze është në procesin e ndryshimeve të legjislacionit që ka të bëjë me azilin, që do favorizon veçanërisht procedurat e përshpejtuara të shqyrtimit të aplikacioneve, në veçanti ato të pabazuara (që është rasti me shumicën e aplikimeve për azil nga ana e qytetarëve të Republikës së Kosovës).

Po ashtu siç u tha në takim, Franca po shqyrton edhe mundësinë që me rastin e refuzimit,  kthimet të jetë më i shpejt.

“Qytetarët e Republikës së Kosovës duhet të evitojnë të bien viktimë të grupeve individësh që organizojnë trafikimin e migracionit të paligjshëm dhe të paguajnë atyre shuma të mëdha parash, të marrin rrugën e panjohur dhe të përfundojnë në qendrat e ndalimit në vendet evropiane”, u tha në takim.

Ndryshe, Policia e Kosovës ka arrestuar një numër të konsiderueshëm të personave që merren me krim të organizuar dhe kontrabandim me emigrantë. Kjo luftë kundër kësaj forme, siç e ka potencuar ministri në detyrë, Bajram Rexhepi do të vazhdojë me prioritet të lartë.

Mbi të gjitha, migrimi i paligjshëm i qytetarëve të Republikës së Kosovës në drejtim të vendeve të Bashkimit Evropian ka ndikim negativ të drejtpërdrejtë në procesin e liberalizimit të vizave dhe të procesit të integrimit Evropian të Kosovës.

Ndryshe vetëm, gjatë muajit të fundit, mijëra kosovarë kanë ikur ilegal në vendet e Bashkimit Evropian në përpjekje për të gjet një jetë më të mirë. Rreth 900 kosovarë janë raportuar se janë zënë nga policia e Hungarisë dhe po mbahen në kampe, ndërsa shumica e kanë pikësynim Francën, e cila Kosovën e ka futur ndër vendet e paqëndrueshme.