Forum biznesi “Diaspora INVEST” në Tetovë

Mundësi zhvillimore dhe urë lidhëse mes diasporës dhe vendlindjes.

Në bashkëpunim me Qendrën për zhvillim të rajonit të Pollogut, Odën Ekonomike të Maqedonisë Veri-Perëndimore, GIZ-it dhe UNDP-së, të premten nga ora 14,  për herë të parë do të organizohet biznes forumi “Diaspora INVEST”.

Qëllimi i këtij eventi është prezantimi i start-up fondeve, të cilat jepen nga shteti zviceran për të lehtësuar investimet nga mërgata jonë, të cilët kanë interesim për të investuar në Maqedoni, si dhe prezantimi i ofertës nacionale për investime të huaja.

“Iniciatori i këtij eventi, ministri për Investime të Huaja, Arlind Zeqiri, së bashku me institucionet partnere do t’i mbështesin në kontinuitet të gjitha negociatat që po zhvillohen me institucionet dhe kompanitë për t‘i mbushur kërkesat e tyre, deri në aktin përfundimtar të zyrtarizmit të investimeve të tyre në Maqedoni”, thuhet në njoftimin e “Diaspora INVEST”.

Synimi i biznes-forumit “DiasporaINVEST” është inkurajimi i mërgatës me qëllim informimi i tyre në sferën e zhvillimit ekonomik të rajonit të Pollogut, që është një potencial ekonomik i Republikës së Maqedonisë.

Vlen të theksohet që pjesë e forumit do të jenë edhe disa kompani të rëndësishme, të cilat kanë fituar këtë start-up dhe operojnë tani me sukses në Maqedoni, ndërkaq pjesë e panelit do të jenë përfaqësuesja e UNDP-së, Louisa Vinton , kryetarja e Komunës së Tetovës, Teuta Arifi dhe ambasadorja zvicerane në Shkup, Sybille Suter.

Forumi i biznesit organizohet nga ministri i Investimeve të Huaja, Arlind Zeqiri, Qendra për Zhvillim Rajonal të Pollogut, OEMVP, GIZ dhe UNDP.