Formacioni i Shqipërisë me Italinë, dilemat e Sylvinhos

Federata Shqiptare e Futbollit

Kombëtarja shqiptare vijon stërvitjen intensive për ndeshjen e parë në Euro 2024, atë ndaj Italisë, në 15 qershor, përcjell albinfo.ch.

Tekniku Sylvinho po provon disa skema se si do të rreshtohet përballë kampionëve në fuqi të Evropës, ndonëse nuk pritet të ketë shumë ndryshime krahasuar me ekipin që pamë në miqësoret e qershorit.

Braziliani ka menduar të shtojë forcat në mesfushë. Me një sistem 4-3-3, në portë me shumë gjasa do të jetë gardiani Etrit Berisha, i cili me eksperiencën e tij do të mbrojë katërkëndëshin. Në mbrojtje ka ende dyshime. Ende nuk dihet nëse nga fillimi do të luajë Ismajli apo Ajeti, ndonëse ky i fundit është më i avantazhuar. Së bashku me të në qëndër do të jetë Berat Gjimshiti, ndërsa nga krahët do të luajnë Mitaj dhe Hysaj.

Sa i përket mesfushës, në seancën e fundit stërvitore braziliani ka provuar të luajë me Asllanin, Ramadanin dhe Laçin. Para tyre qëndron Bajrami, një lojtar i shpejtë dhe që tenton shpesh të godasë portën nga jashtë zone, ndërsa Seferi mund të ulet në stol.

Sulmi ka dy emra të sigurt, me Armando Brojën dhe Jasir Asanin.

Në stërvitje,  Sylvinho do të provojë të dyja skemat, 4-2-3-1 (që kemi parë deri më tani) dhe 4-3-3, për të vendosur më pas për titullarët e tij.

Dueli me Italinë është i programuar këtë të shtunë, në Dortmund, në orën 21:00.