Folklori bashkon shqiptaret në Amerikë

Festivali Folklorik Mbarëkombëtar ka mbledhur në Nju Jork qindra solistë, valltarë e grupe muzikore e asamble nga komuniteti shqiptaro-amerikan.

Qëllimi i këtij festivali sipas organizatorëve këtë vit i dedikohej 550 vjetorit të heroit kombëtar të shqiptarëve, Gjergj Kastriotit-Skënderbeut, si dhe ruajtjes dhe promovimit të trashëgimisë sonë kulturore.

Një rol qendror në këtë organizim ka grupi i parë artistiko-kulturor brenda komunitetit amerikan “Rozafati”, i themeluar para tri dekadash pranë Qendrës Katolike Shqiptare “Zoja e Këshillit të Mirë” në Nju Jork.

“Në fakt është Rozafati pothuaj organizator i këtij festivali dhe Angjelina Nika është ajo që u mëson qindra fëmijëve vallen shqipe në sallën e Qendrës Kulturore Shën Nënë Tereza. Dhe, nuk ka çmim që e paguan kontributin e Angjelinës dhe rolin e saj në ruajtjen e këtyre vlerave tona kulturore”, tha për RTK-në Marjan Cubi, kryetar i Qendrës Kulturore Nënë Tereza, pranë Kishës Zoja e Shkodrës në Hartsdale.

I organizuar nga Kisha katolike “Zoja e Shkodrës” edicioni i 27-të i këtij festivali u zhvillua në Qendrën e Arteve të kolegjit Lehman në Bronks të Nju Jorkut. Misioni i këtij festivali është përpjekja për të identifikuar, dokumentuar e prezantuar folklorin mbarëkombëtar shqiptar si dhe të mbajë të bashkuar komunitetin shqiptar.