FMN ul ndjeshëm parashikimin për rritjen ekonomike të Shqipërisë

FMN rishikon parashikimet për ekonominë shqiptare dhe botërore

Fondi Monetar Ndërkombëtar (FMN) ka ulur parashikimin për rritjen ekonomike të Shqipërisë në 2025, nga 3.8% në 3.4%, ndërsa për 2026 pritet një rritje e lehtë në 3.6%. Inflacioni mesatar pritet të rritet në 2.3% këtë vit dhe në 2.8% në 2026. Në rajon, Kosova parashikohet të ketë rritjen më të lartë në 3.9% (2025) dhe 4% (2026), ndërsa Maqedonia e Veriut 3.4%, Mali i Zi 3.2%, Bosnja dhe Serbia 2.4%, përcjell albinfo.ch. 

Në plan global, FMN paralajmëron për presionet e tarifave dhe proteksionizmit amerikan, megjithëse ekonomia botërore po reziston më mirë se pritej. Rritja globale pritet 3.2% në 2025 dhe 3.1% në 2026. SHBA do të ngadalësohet në 2% këtë vit, ndërsa Kina parashikohet të rritet 4.8% në 2025 dhe 4.2% në 2026.

FMN vëren gjithashtu stabilizim të inflacionit mbi objektivat e bankave qendrore në disa vende dhe paralajmëron rritje të huamarrjes dhe nevojë për shkurtime të shpenzimeve në Europë për shkak të plakjes së popullsisë dhe kostove të energjisë dhe sigurisë.

---