Floktarët mezi presin zbutjen e masave: Do të punojmë me maska mbrojtëse

Floktarët dhe klientët e tyre, duhet të mbajnë maska ​​mbrojtëse. Koncepti po ashtu mbështetet në mbajtjen e dorezave (për një përdorim) për floktarët, pastaj veshjen e manteleve mbrojtëse për klientët

Floktarët duhet të jenë ndër të parët që do të lejohen të punojnë pas zbutjes së paralajmëruar nga ana e Këshillit Federal, të masave kundër koronavirusit. Shoqata e floktarëve e Zvicrës ka krijuar një koncept prej dy fazash për një rast të tillë, shkruan srf.ch. Koncepti, mes tjerash konsiston në punën me maska mbrojtëse.

Në fazën e parë, floktarët duhet të jenë në gjendje të hapin pjesërisht lokalet e tyre, shkruan Damien Ojetti, kryetar i federatës “Coiffure Suisse”, në faqen e internetit të kësaj federate, transmeton albinfo.ch. Për shkak të mbajtjes së distancës së sigurisë, sallonet fillimisht duhet të shërbejnë vetëm deri në gjysmën e vendeve që kanë, me një pjesë të fuqisë punëtore dhe me së paku një praktikant.

Floktarët dhe klientët e tyre, duhet të mbajnë maska ​​mbrojtëse. Koncepti po ashtu mbështetet në mbajtjen e dorezave (për një përdorim) për floktarët, pastaj veshjen e manteleve mbrojtëse për klientët dhe dezinfektimin, përcjell albinfo.ch. Për punët në fytyrë – siç është kujdesi për mjekrën, rroja, kozmetika dhe manikyri, punonjësit duhet të vendosin në fytyrë një maskë plexiglasi.

Më tutje, sipas konceptit në fjalë, pjesëtarët e grupeve të rrezikuara do të përjashtoheshin nga zbutja e pjesshme e përmendur, dhe floktarët nuk do të lejoheshin akoma të punojnë në shtëpitë e pleqve, transmeton albinfo.ch. Në fazën e dytë, sallonet duhet të lejohen të hapen plotësisht përsëri dhe t’u përmbahen masave të përcaktuara nga Zyra Federale e Shëndetit Publik.

Pak ditë më parë mediat kanë publikuar edhe lajmin sipas të cilit deputetja e SVP-së dhe ndërmarrësja e njohur Magdalena Martullo-Blocher kishte porositur në Kinë  600 mijë maska të dedikuara enkas për floktarët, transmeton albinfo.ch. Sigurisht, kush dëshiron t`i sigurojë ato maska, duhet t`i paguajë.

---