Fjalimi i Presidentes Keller-Sutter: Vlerëson modestinë zvicerane

Presidentja zvicerane për vitin 2025, Karin Keller-Sutter, ka nënvizuar rëndësinë e kompromisit dhe përulësisë në politikën zvicerane në fjalimin e saj të Vitit të Ri drejtuar kombit

“Përulësia, në kuptimin më të mirë të fjalës, është një vlerë që është pjesë e traditës së vendit tonë”, tha Keller-Sutter në fjalimin e saj të botuar më 1 janar.

Është një kërkesë bazë për funksionimin korrekt të institucioneve zvicerane dhe për bashkëjetesë të mirë, tha ajo. Nëse Zvicra nuk do të kishte përulësi përballë demokracisë, çdo vendim do të çonte në trazira, tha 61-vjeçarja, raporton Swissinfo.ch, transmeton albinfo.ch.

Keller Sutter, e cila merr presidencën e radhës zvicerane në 2025, është gjithashtu kreu i ministrisë së financave.

Zvicra është një vend kompromisi, tha presidentja e re, dhe kjo kërkon mirëkuptimin se edhe të tjerët kanë shqetësime legjitime.

Është e paqartë se çfarë do të sjellë viti 2025, vuri në dukje ajo, por Zvicra mund t’i afrohet këtij viti të ri me besim.

“Zvicra është e fortë dhe ka kapacitetin për të vepruar,” tha Keller-Sutter, duke shtuar se institucionet demokratike dhe kushtetuese zvicerane funksionojnë mirë dhe ndjenja e komunitetit është “e ankoruar fort”.

“Ne mund të gjejmë zgjidhje. Kjo nuk është diçka që duhet marrë si e mirëqenë dhe ne mund të jemi mirënjohës për këtë”, komentoi ajo, duke shprehur falënderimet e saj për ata që kontribuojnë në “suksesin e të jetuarit së bashku çdo ditë”.

Në vitin 2025, Keller-Sutter do të jetë gruaja e dhjetë që do të mbajë postin e presidentit zviceran. Doris Leuthard (Partia e Qendrës), Simonetta Sommaruga (Partia Social Demokratike) dhe Micheline Calmy-Rey (Partia Social Demokratike) ishin presidente dy herë, dhe Ruth Dreifuss (Partia Social Demokrate), Eveline Widmer-Schlumpf (Partia Demokratike Konservatore) dhe Viola Amherd Partia e Qendrës) ishin presidente dikur.

 

---